Mercedes GLC Problems Disadvantages Cons
Namashkaar dosto, carcomparos mein aap ka swagat hain, main hoon aap ka dost Master Kaushal Choudhary, aur aaj hum aap ke liye le kar aaye hain, Mercedes GLC ki paanch dilchasp khoobiyaan. Pehli khoobi hain iska lajawaab pick-up. GLC ka three-hundred four-matic model, six-point-two seconds mein, sau ki raftaar haasil kar paata hain. Matlab Vinfast ki VF7 se bas thoda-sa dheema hain. Aur keemat mein bhi sirf saath-baasath lakh ka fark hain. Aisa samajh lo, ke nabbe laakh de-kar ap jo GLC khareedoge, uspe chipkaye hue Mercedes ke logo ki keemat hain painsath laakh, aur moolabhoot gaadi ki keemat hain pacchis laakh. Toh ho gaye na kul milakar nabbe laakh. Aakhir Mercedes ki chandni ke painsath laakh toh bante hain na dosto? Diesel GLC aap ko ded laakh rupay mehengi pagegi. Lekin uska pick-up bhi burha nahin hain. Wah 8 second mein sau ki raftaar haasil kar leti hain. Matlab Creta Electric se bas thoda-sa dheema. Aur Creta Electric ki keemat bhi toh sirf sattar laakh rupay sasti hain GLC se. Chalo electric gaadiyon se tulana nahin karte. Bass itna yaad rakh lo, ke aaj saath laakh rupay mein milne waali Golf GTi, petrol-GLC se aadha second tez hain, aur diesel GLC se 3 second tez.
Lekin Golf toh ho gayi brand new. Asli khazana toh used car market mein chupa hua hain. GLC three hundred ke, petrol model jitna pick-up dene waali, diesel C Class, kisi zamaane mein, Mercedes khud apne market mein le aaya tha. Uss ajoobe ka naam hain C two-fifty CDI. Paanch sau Nm torque hain usmein. Jee haan, paanch sau. Yane ke GLC three hundred se sau Nm jyada! Aur aisi dehr saari C two-fifty CDI aaj used car market mein uplabdh hain. Aur wo bhi paanch laakh rupay mein. Matlab GLC se poore pichasi laakh rupay kam. Ek baar thande dimaag se socho, agle paanch saat saal mein aap hazaro baar overtaking toh karoge na. Uss har ek overtaking ke waqt, C two fifty CDI, aap ko GLC se jyada asaani se overtake karne degi. Aakhir gaadi ek chalta phirta auzaar hain, aur usmein overtaking ki kshamata behat jaroori hoti hain. Aur wo aap ko nabbe laakh rupay dene ke baad bhi, GLC mein theek-thaak hi milegi. Toh nabbe laakh barbaad karne se pehle, ek baar, kewal ek baar, ek used C two-fifty CDI ki test drive toh jaroor kar lena. Itna hi nahi. C Class ka suspension bhi GLC se jyada comfortable hain. Wah gaddhon aur speed breakers ko behtar sokh leta hain. GLC oonchi aur bhaari hone ki wajah se, Mercedes ko, uska body roll - yane ke modh lete waqt, uski daaye-baaye dolne ki pravritti, kaboo mein rakhne ke liye, suspension ko jyada sakht banana pada hain. Oopar se uska pakad santulan bhi C Class jitna acha nahi hain. Toh aisa mat sochna ke bade payye aur chaude tyres waali gaadi hamesha acha hi suspension comfort deti hogi. Bewakoofon ko lene do nayi GLC. Aap toh apne paise bacha lo. Doorsri aur, nabbe laakh ki gaadi lene mein koi harj nahi hain. Lekin utne paison mein acchi-si, used-Cayenne mil jayegi. Jaise ye e-hybrid, jo paanch second mein sau ki raftaar haasil kar leti hain. Aur har pehelu mein, iss ghatiya GLC se behtar hain.
GLC 300 4MATIC - 88.0 Lakh - 0-100 - 6.96 sec - https://www.youtube.com/watch?v=yrKzPzrOLio&t=1189s
GLC 220d 4MATIC - 89.5 Lakh - 0-100 - 8.0 sec - https://www.automobile-catalog.com/car/2026/3379565/mercedes-benz_glc_220_d_4matic_suv.html